ウチナーグチし、ゆんたくさびら！

なま、きぢちゃしが。。。

１／２２ぬ、ダブリンぬ、フライト（１４時間３０分）をぅ、１８日ぬ、コペンハーゲン（１７時間）かい、トリップトレードし、うむっさーくーすーたしが、


うれー、

５日間ぬ、トリップる、やいびーんでーやー！　

うふそーとっとい！　

あぁああああああああああああ、っしに、ふらー！

あんし、物価ぬ高はるとぅくまうてぃ、まるまる３日間ういねー、トリップぬ、半ぶのー、給料が、ねーんないしがっ！




  

１２／２８／０９　月曜日　ナシュビル　晴れ　−１℃

なま、シーフートお好み焼き、ふーじーぬ、ひらやーちー、つくとーぃびーしが、メリケン粉ー、かじゃーすしが、だてぃー、なとぅーがら？　

てぃーち（一枚）、味見ぐぁー、されー、なー、わたん、みっちっちょーんん。

２回目んのー、堅くなとぅーしが、ぬーんでぃちがら？

まーすぬ、量や、いいあたいぐぁーやしが、メリケン粉ーかじゃーが、気にないっさー。。。

あとぅ、シーフードや、冷凍むんどぅ、やいびーしが、うれー、さちに、煮ちゅーかんねー、ならんたがら、わかいびらん。

解凍し、しぐー、メリケン粉ーんかい、たっくでぃ、みじ、いったーにかい、かちゃーちから、「あい、シーフード、にちぇーかんしが、しむたがらやー？」んでぃ、うみたしが、なー、うすはるあくとぅ、弱火ぐぁーてぃ、よんなー、つくとーぃびーん。

だぁー、ディーンが、ぬーんでぃ、あびーがら？

まーこーねーんやれーからー、サラダが、あくとぅ、しむがや。。。？

やしが、

どぅくん、てーまい、かきまじてーくとぅ、あとぅ、１５枚びっけー、つくらりーぎはーどーやー。。。



なーなーなー、でーじなとーん！  

１２／２０／０９　日曜日　ニューアーク　晴れ


なまからオスロんかい、やいびーしが、にーぶいそーん！

ひさびさぬ、しぐとぅ、昼寝ん、ぬーんせーうかんくとぅ、でーじなとーん！

はぁ〜〜〜〜〜〜。



  

１２／０９／０９　水曜日　晴り　うちなー


ちゅうや、おかあぬ、学校うてぃ、クリスマスパーティーが、あいびーんでぃがら。

やいびーくとぅ、ちゅうや、してぃみてぃぬ、５時に、ゆーふる、いっち、かーらじ、セットし、おしろいんし、いっぺー、ちゅらかぁぎぃなとーぃびたん。（笑）

学校ぬ、いんけーが、ちゅーる、１時間めーから、げんかぬんかい、ひらきてぃ、ちゃあまちーし、ぬーんがら、わらびねーし、かなはくなたん。

ちゃあー、てぃーさーじ、首んかい、かきてぃ、いちゅしが、ちゅうや、花柄ぐぁーが、ましんでぃち、じゅんに、可愛いやっさーんでぃ、うみたん。

わんにん、とぅしとってぃん、おかあねーし、可愛い、老じぬんかい、ないねーやーんでぃ、うみゃびーん。








冷え性ぬ、おかあんかいや、いっぺー、上等、うくいむんやいびーん。
本にぬん、大満足そーぃびーん。
  

やーんかい、けーてぃっち、いくちん、なちかさる、くとぅば、ちち、にやにや〜そーいびーん。（笑）

にぃにぃが、かじひち、「とーみーすーたん」んでぃ、いーくとぅ、ねぇねぇん、わんにん、たいんなむん、「うれー、ながでー、ちちゃるくとぅ、ねーんさー」んでぃち、爆笑やいびーたん。



  

たぁーがら、わかいびらんしが、

わんが、あみとぅーるとぅきに、電話はんけー！　



あんし、



たぁーがら、わかいびらんしが、

わんが、便所んかい、いっちゅーるとぅきに、電話はんけーやー！



はぁーなぁー、たぁーやたがら。。。

留守番電話んかいん、メーッセージ、ぬくちぇーかんでー！！  

ちゅう、２番みーぬ、じゃー、かたじきとぅーたれー、くぬめー、うちなーから、アミリカんかい、けーてぃちゅーるばーに、飛行機んなかうてぃ、いたる、新聞が、いんじてぃっちゃん。あんいーねー、やーうてぃ、よんなー、ゆまんでぃち、とぅってぃ、うちきてーたっさーんでぃ、うむいけーち、てぃー、やしみてぃ、ゆでぃんちゃん。

１１ぐぁち、とぅーかぬ、読売新聞やいびーん。うりんかい、うむっさるくとぅ、書かっとーいびーたくとぅ、うまんかい、いひぐぁー、書ちんだひーたい。

うぬ、はなしーや、作家ぬ、角田光代さんどぅしが、書ちぇーるふーじーやいびーん。

題や、「ちてーしんかいや、技（わざ）が、いぃーん」

　　　「さくんじーしぬ、マナー」


んどぅるくとぅやいびーん。


ちゅぬ、さくんじーよーんかいや、種類があてぃ、うりんかい、いちゃんとぅーし、対応すしぇーましが、んどぅるくとぅやいびーん。

うぬ、種類んどぅしぇー、

①威嚇（いかく）→いっぺーわじやーにかい、牙いんじゃち、相手うどぅすん。

目的や、相手、うどぅるかち、びびらするくとぅるやいびーくとぅ、しかめーからーしむん。

②発散（はっさん）→ちむんかい、ふがんくとぅが、たまやーにかい、ストレス発散、ないるとぅくま、てぃめーとぅーくとぅ、発散はりーるわーき、まちゅん。

③感情（かんじょう）→うぬまんまー、うみとぅーるくとぅ、あびてぃ、感情をぅ、爆発しみーしが、うぬうちに、うさまいん。

④解決（かいけつ）→解決策むとぅみとぅーるばーるやくとぅ、専門ぬ、うっちゅんかい、まかしーん。


日常生活んかい、うちきてぃ、①とぅ②や、威嚇（いかく）はんねーならんたい、発散はんねー、ちゃーんならんどぅる、特殊ぬ、うっちゅが、特殊ぬ、状況うてぃしか、はん。

わったーみーんかい、だてぃー、ちちゃはる、③とぅ④や、あらわりーかたや、ちげーぃしが、じちぇー、てぃーちんかい、ちながってぃうてぃ、日常生活うてぃ、わったーや、まじ、感情爆発しみやーにかい、うまから、なんとぅか、さくんじとぅーる、原因をぅ、わじらちゃる、相手んかい、ちたぃてぃ、問題解決、はかいんでぃすーん。


わじーしぇー、いちゃっさ、正統的ぬ、わじわじーやてぃん、感情、爆発しみーねー、相手んかい、通じらん。

１００さくんじとぅーくとぅ、１００さくんじとぅーし、みしらんねーならん、どぅるくとぅや、まちがとぅーん。

どぅーんくとぅ、ふりけーてぃ、いんちん、１００ぬ、ぐてーし、ぬーらーったる、場合、いだちゅせー、冷静な反省や、あらんぐとぅー、「うどぅるち」「うとぅるさ」「反発」「空白（ちゅぶるん、中が、まっしーるー状態」し、くれー、威嚇とぅか、発散が、むとぅみとぅーる、対応どぅやる、解決んかいや、至らん。


ちゅんかい、ちてーぃぶはる、わじわじーんかいや、技が、必要。あんし、相手ぬ、わじわじーぬ、度合い、判断すしん、技が必要。

ただ、ひたすら、さくんじーる、相手とぅ、冷静に、いかいあーぃん。


んどぅるくとぅ、やいびーん。





  

ちゅうや、まーだ、むのー、かでーうかんさー。。。  

Sleepless　Night　in　Nashville。。。

は〜な〜、ちゅーん、にんだらんどーやー。。。。

きぬーや、あかとぅんちぬ、５時ぐる、にんてぃ、ちゅーん、うんとぅーるないびーがら。。。

やしが、なまー、なー、４時やいびーくとぅ、ちゅうや、６時ぐるに、にーぶいし、ちゅーがら、わかいびらんさー。

しんでー、しんでー、うすくなてぃっちゅーさー。

日本時かぬんかい、あーてぃっちゅーん。

時差ぼけんでぃーねー、あんやがら、わかいびらんしが、やしが、昼間、日本時間ぬ、ゆなかん、ちゃーうきーすーくとぅー、うれー、いほーなむんやいびーんどー。


  

うまー、ぬーんでぃちがら、ごーぐち、あびーる、とぅくまんかい、なとーぃびーっさー。

ごーぐちや、ないるかじりー、しーぶこーねーんしが、

だぁー、

わんねー、うんぐとぅー、性格やいびーくとぅ、あびらんねー、気がすまんふーじーやいびーんでー。



なま、うまー、ゆなかぬ、０３：３０やいびーん。

きぬーぬ、０４：３０びっけーから、うきてぃ、なー、するする、２４時間やいびーしが、にーぶい、はんだんでー。

ぬーんでぃちがらやーたい。。。。。

あんすくとぅ、うまうてぃ、どぅーちゅいむにー、するくとぅんかいさびたん。


陽ーが、くりーしぇー、へーくなてぃ、きぬーや、５時半ねー、まっくらしんすーたっさー。

あんしーねー、ぬーんがら、ちむん、うちくむっさー。


わんぬ、しぐとぅや、くんぐぁちや、２５日からどぅやいびーしが、１６日から、ぬんがら、ピックアップし、はじみーる、かんげーやいびーん。

１２ぐぁちん、うちなーんかい、けーいる、ちむいやいびーくとぅ、なーひん、もーきらんねー、ないびらん。

じちぇー、しぐとぅが、恋しいやんばーるやいびーしがてー。

やっぱり、わんにんかい、ながでー、やーんかい、うとぅーちゅんどぅるくとー、ならんがらわかいびらん。（笑）

やーんかい、うとぅーちゅしゆーかー、しぐとぅすーしがる、ましやいびーっさー。。。

うんとぅーくとぅや、「貧乏性」んでぃるあびーがらやーたい。。。。。




きぬーぬ、味噌汁や、いっぺーまーはいびーたん。

わいぬん、まーはぬ、ラッキーやいびーたん。

だぁー、ちゅうや、ちゃんぐとぅー、日ー、ないがら、たぬしみやいびーん。

あんしぇー、またやーたい。



  

ゆくしらっさい！

ああああああああああああ、やみてぃくみそーりーーーーーーー！

はあぁ〜〜〜〜〜〜っしぇ、テイラー・スフィフト（Talor　Swift）が、くとぅしぬ、「最優秀歌唱賞」んでぃる、あびーがら、「Year　of　the　Vocalist」んでぃ！

は〜っしぇ、ゆくしらっさい！

は〜な〜、うん国ん、いひぐぁー、ちがとーんどー！

たぁーが、えらだがら、わかいびらんしが、うぬ、１９ぬ、わらびや、じょーーーーーーーーーーーい、じょーーーーーーーーい、マティーナ・マクブライトとぅか、リバ・マッケンタイヤーねーしぇー、うたーいはんしが！　

うりぬ、ライブん、いんじゃるくとぅが、あしが。。。。

じょーーーーーーーーい、

じょーーーーーーーーーーいどーやー！！！！！！！！！！

くぬ、わらびびっけーや、ゆるさらん！



確かに、「エンターテインメント」や、じょうじやいびーくとぅ、うれーしむしが、歌唱力？

はーなー、わらーはんけー！　んどぅる感じ。


あああああああああああああああああああああああああ、うまが、海んにーやれーからー、さきどぅーたるはじやっさー！




深呼吸３２回。。。。






くぁっちーさびたん！　









「ハーシーズ・キス」んどぅる、チョコレートやいびーたん。


フゥ〜。。。














  

はーんまよーなー。

なま、トラベルオフィスんかい、いっちょーいびーしが、チケットゥ、プリントする機械が、やんでぃてぃ、メンテナンス待ちやいびーん。成田からうちーわーきぬ、チケットやプリントはっとぅーしが、うちなーから、成田わーきぬむんが、プリントはっとぅーかんくとぅ、うり、こーいんでぃち、うまうてぃ、あしどぅみーなとーいびーん。

はーなー、にーりーっさー。

なま、メンテぬ、うっちゅが、いっちゃしが、ちゃくとぅ、ゆんたく、ひんたくすーっさー。。。

え〜、にぃさん、

へーくなー、のーちとぅらはんなぁー？




  

きぬー、しちゃぬ、やーんぬしぬ、とぅじが、わったーにーんかい、むちいっちとぅらちぇーたん。

めーとぅし、くぬ時期に、リンゴえぬんかい、いちゃびーんでぃがら。

いっぺー、まーはいびーたん。

くぁっちーさびたん！

  

１０／１４／０９　水曜日　快晴　アムステルダム（Amsterdam）日中１１℃　朝夕２℃






久々ぬ、ファーストクラスぬ、通路側担当やいびーたん。ちゃあ、ギャレー（キッチン）ポジションびっけーし、奥んかい、ひっくどぅーくとぅ、うんとぅーし、たまに、通路んかい、いんじーねー、緊張すっさー。やしが、客層ん、まじゅい、はたらちゅーる、うっちゅんちゃーん、いいうっちゅんちゃーやいびーたくとぅ、たしかたん。

うまんかい、ちっちから、ちゃくん、わったーん、飛行機からうりてぃ、ゲートいんじたるとぅくまうてぃ、わんが、担当さる、ちゃくが、わったーにんかい、いんかてぃ、はしてぃちゃいびたくとぅ、ぬーがやー？　んでぃ、うみたれー、「コートうきとぅってーうかん」でぃち、コートとぅいが、むどぅいる、とぅくまやいびーたん。あんし、わんねー。「へ〜い？　は〜や〜？　コートや、むる、けーちゃるはじやしがや〜？」んでぃ、うみたしが、うぬ、ちゃくとぅ、まじゅい、飛行機んかい、むどぅたん。あんされー、くんちょー、コートどぅくるか、どぅーぬ、くすいん、わしりてぃ、うちきてーたん（はぁ、コートゆーかー、くすいがる、てーしちあらに？）。んでぃ、うみたしが、まじぇえ、くすいん、コートん、うきとぅってぃ、一件落着ふーじー。くぬ、ちゃくや、いっぺー、うふやしーうかたやいびーたくとぅ、くんちゅんかい、ぬらーりーるくとぅんねーらん、いっぺー、ラッキーやいびーたん。いいわけー、通用はんしが、くんちゅぬ、コートや、わったーむんとぅ、にちょーたくとぅる、クローゼットぬ中んかい、ちゃーうちきーし、くんちゅんかい、わたちぇーかんたるばーるやいびーん。なまからぁ、いっぺー、きーちきらんねーならんさー。んでぃ、反省さびたん。

ホテルんかい、ちっちから、４時間びっけーにんてぃから、ちゃー、いちゅる、ゴッホ美術館ぬにーぬ、スーパーんかい、いんじゃん。
あまんかい、レモングラスぬサラダドレッシングが、あいびーたくとぅ、８本とぅってぃ（お土産用）、かごんかい、いってぃ、ちゅうぬ、ゆうはぬんとぅ、あちゃぬ、してぃみてぃむぬんかい、ないぎはーやる、サラダとぅ、バナナとぅ、グレープフルーツん、たっくだーにかい、ワイぬん、時間かきてぃ、吟味し、やっとぅ、決まてぃ、キャッシュレジスターんかい、いんじゃれー、、、、、クレジットカードやちかーらんどぅるくとぅ。

はぁ？

めーや、ちかーりーたるむんぬ、ぬーが？

んでぃち、キャッシャーんちゅんかい、あびてぃん、「ちかーらんどーんでー」んどぅるふーじー、やいびーたくとぅ、なー、あきらみてぃ、うぬ、スーパーいんじたん。

かんげーてぃんでーからー、めーや、現金し、支払いすーたるはじやっさー。。。

わんぬ、ちゅぶるよー！　

あんしから、くんどー、なーてぃーちんにーんかい、いんじ、こーいむん、しっちゃん。　うまがる、ホテルから、ちちゃはくとぅ、さいしょから、うまんかい、いけーしむたるむんぬやーたい。。。




  

なー、なーなーなー、でーじなとーん！


あちゃぬ、フライトや、イギリスぬ、マンチェスター便。

あまぬ、ホテルんかいや、幽霊が。。。

ひぇ〜〜〜〜〜〜！！

やしが、しかたんねーらん。

なまん時期や、ぬーんねーらんくとぅ、いちゅしかねーらん。

また、めーぬ、経験や、あれー、幽霊や、あらんたがら、わからんくとぅ、またん、いんじんち、たしかみてぃ、いんじゅせーましがら、わかいびらん。

うりが、あくとぅ、マンチェスターや、さきとぅーたしが、するする、うりん、克服し、いかんねーないびらんどーやーたい。

なーいひぐぁーや、いじぐぁー、いんじゃち、いかんねー、ないびらんさー。

あんしが、

うとぅるさぬ！



あ〜〜〜〜〜〜、うとぅるさよ〜！

あちゃー、まーすとぅ、にんにくとぅ、十字架、むっちいかんねーならんさー。。。。  

野薇（のら）んどぅしぇー、わったーやーんかい、ちゅーる、ノラ猫。

かってぃに、のーじちきてぃ、写真とぅてーしーしーそーいびーん。

はじみてぃ、うぬ、野薇とぅ、対面させー、くんぐぁちぬ、６日やいびーたん。

あんとけー、わんにんかい、まーだ、なりらんくとぅ、わんぬ、ひさん、うとぅ、ちちゅるだきし、しぐ、ひんぎーやいびーたん。

しゃしぬん、とぅららんたくとぅ、車んなかんかい、くぁっきてぃ、とぅったしが、ちゅーや、わん、いんちん、しぐー、ひんぎらんでーはん。「のら〜、のら、のら〜！」んでぃ、ゆびーねー、まんがらから、いんじてぃいっち、わんびっけー、ちゃーみーちきーすん。

どぅー、ゆばっとぅーんでぃ、わかてぃっちゅーるはじやいびーっさー。

なーいひぐぁーし、わったーにーんかい、ちゅーるはじ。













  

ちゅうや、９／１１。

ありから８年。　

あんときや、わんねー、やーうてぃ、ゆっくぃとぅーたるとぅくまんかい、ディーンから、電話があてぃ、「テレビちきてぃんでー」んでぃ、いやったくとぅ、テレビちきたれー、まーんくぃー、うぬ、ニュースそーいびーたん。　

テレビちきてぃから、いひぐぁーし、２機目ぬ、飛行機がたーちめぬ、トレードセンターんかい、つっこむるとぅくまやいびーたん。

はー、あんとけー、いっぺー、しかだん。


つづきや、又あとぅからやーたい。

しぐとぅんかい、いんじくーひーたい。

なまから、ニューアークやいびーん。

あんしぇー、また。  

納豆ダイエット開始！

いちゃっさ、やしらりーがらやーたい。。。

あちゃからぁ、しぐとぅやいびーくとぅ、いひぐぁ〜や、やしらりぃ〜るはじ。。。んでぃ、うみとーぃびーしが、ちゃあないがら？


  

ちゅうぬ、フライトぬ、ハイライトやいびーしが。

うれー、ぬーんでぃちん、

ちゃくぬ、「むすこ」。

「だぁー、おおじ、むっちくれ〜！」んでぃ、わんぬ、ちゅうぬ、ぱーとなーが、あびとーぃびーたん。（笑）



ぬーがんでぃーねー、（笑）

うぬ、ちゃくよー、

わったー、飛行機が、とぅびたちゅるめーに、寝間着んかい、けーたーにかい、ズボンや、だばだばー。

離陸しから、しぐにんじーし、本人や、にんとぅーしが、むすこや、いっぺー、元気やいびーたん。（爆）

どぅーんかいや、ぬーん、かんしらんぐとぅー、にんとぅーたくとぅ、また、うりが、みだちねーびらん。

はーっしぇ、にーせーよー、にんじゅるばーや、もうふぐぁー、かきて、にんてぃ、くみそーりよー！！








  

ちゅうや、どぅしぬ、JGが、コペンハーゲぬんかい、いちゅんでぃーくとぅ、うりぬ、チェックインタイムんかい、あーち、クルールームんかい、へーくなー、ちゃびたん。

久々に、くりとぅ、あーたがやーんでぃ、うみたれー、なー、たいんかい、ひさしぶりに、あーてぃ、一日ぬ、スタートが、明るくないびたん。

ちゅうや、わんねー、なまからオスロんかい、やいびーん。

オスロや、ひさしぶりやいびーん。

なー、なちん、うわいがたーやるはじ。

くじゅぬ、オスロぬ、秋や、いっぺー、ちびらーはたっさー。

ちゅうや、ちゃんぐとぅ、トリップんかい、ないがらやーたい。

あんすらー、また、あとぅから。。。