ふらーむにーはんけー！　

わらびん時分に、うとぅなんかい、ゆー、「うんわらびや、ふら〜むにぃ〜し、な〜、で〜じなとぅ〜るむん！」んでぃ、あびらったる、うっちゅや、まんどぅーるばーやあらんがやーんでぃ、うみゃびーん。わらびんちゃーや、想像力んまんでぃ、てぃーち、ぬんがら、いんじーねー、うりから、想像みぐらちゃあーにかい、どぅーんちゅぶるんなかうてぃ、ありんくりん、たっちきてぃ、あーし、くーし、うんとぅーなてぃ、うりせーからー、うんとぅーないるはじ！んでぃち、うりから「希望」んどぅしが、うまりてぃちゅーるばーるやいびーん。あんし又、どぅちゅいし、だまてーうららんくとぅ、まわいぬ、どぅしぐぁーとぅか、うやちょーでー、学校ぬしんしーたーんかい、あびてぃ、ふみらりーし、まっちゅーるばーるやいびーん。


どぅしぐぁーんちゃあーやれーからぁ、「あいっ、やっさーやー！」んでぃち、まじゅいなー、想像しーがちーなー、はなしーし、いっぺー、うむっさぬ、わくわくーし、うんとぅきうっさ、幸しんどぅし、かんじーるくとーねーんしが、うとぅなんちゃーんかいや、「やーや、なー、ふらーむにーし、でーじなとぅーるむん！」んでぃ、ふみらりーるどぅくるか、ふりむんあちけーはってぃ、ぬらーってしーしーすん。
うりが、「失望」んどぅしやいびーん。


わらびんちゃーや、「はぁーっしぇ、あびらんけーしむたん！」んでぃち、しでーに、うとぅなとぅ、はなしーしーぶこーねーらんないるばーるやいびーん。あんし、しでーに、想像力んおとろえてぃいっち、いちぬ間にか、うとぅなんかいなてぃ、うとぅなんかいないねー、「固定観念」んどぅしが、ちゅぶるんかい、住みちっち、型んかい、はまとぅーるむんしか、みーらんないん。道ん、だってんぐぁーに、舗装はっとぅーるとぅくまびけー、えらでぃ、あっち、どぅーし、草んみーとーち、あっちゅんどぅるくとー、はんないん。いきどぅまいや、いきどぅまいんでぃち、あきらみてぃ、U-ターンするばーん、まんどぅーん。


うぬ、「固定観念」どぅせー、あんまし、上等やあいびらんくとぅ、してぃーしぇーましんでぃうみてぃないびらん。おんなじ、しかくーやてぃん、むる正方形びっけーやあらんしとーいんむん、なま、かかえとぅーる問題や、角度けーてぃいんじーねー、簡単に解決ないしがらわかいびらん。　あんし、わらびん時分ねーし、ありくり想像さーにかい、いみいんじゅせー、健康んかいん、上等んでぃるうみーんでー。


だぁー、ぬーあびーんでぃちやたがら、わからんなたん。。。。






あー、



想像とぅ、冒険心や、ちゅ、成長しみーる要素んどぅるくとぅやいびーたん。


あんすくとぅ、ぐすーよー、わらびんちゃーんかいん、うとぅ、とぅじ、どぅしんちゃーんかいん、まじゅい、わじゃすーるうっちゅんかいん、たーんかいん、


「ふらーむにーはんけー！」


んでぃ、あびてぃとぅらすなよーたい！