ウチナーグチし、ゆんたくさびら！

  

わんぬうとぅが、車ぬ、サイドミラー、やまちっちゃん。

うりし、３回み〜ど〜や〜。

最初や、対向車が中央線から、とぅびいんじてぃっちゃくとぅ、うり、ゆき〜んでぃち、にじりんはら〜んかい、ゆたれ〜、木〜ぬ、え〜だんかい、あたてぃ、ミラーぐとぅ、ね〜んなとぅ〜たん。

2回み〜や、うぬサイドミラーの〜ち、や〜んかい、け〜いる途中に、まが〜とぅいが、ぶちかてぃっちゃんでぃがら。
うん時や、さふどぅ、ダメージがね〜んたくとぅ、どぅ〜し、のーちぇ〜たん。

くんどぅんの〜、高速道路、あっかちゅ〜るとぅきに、め〜ぬ車ぬめ〜から、「アリゲーター」んどぅる、破裂さるタイヤ〜ぬ破片が、とぅでぃっちゃんでぃがら。

は〜、うとぅるさよ〜。

やしが、高速道路やくとぅ、しぐ〜ん、とぅみららんし、運転席から、いんちゃる分ね〜、車んかいやまが〜ダメージん、ね〜んね〜すくとぅ、や〜わ〜き、ま〜んかいん、とぅまらんぐとぅ〜、け〜てぃっちゃんでぃ。




あんし、車からうりてぃ、タイヤぬ破片が、当たたるとぅくま、しらびてぃいんちゃれ〜、

あきさみよ〜な〜、サイドミラーぬ、くしぬカバーが、ね〜んなとぅ〜せ〜や〜！

「は〜な〜、に〜り〜っさ〜」んでぃ。笑

われ〜いぐとぅやあらんしが、又んサイドミラーな〜？

んでぃち、うかはくなたん。

やしが、うんとぅきぬ、状況、想像し〜ね〜、いっぺ〜、危なはて〜ん。

まが〜事故んかいならんぐとぅ〜、たしかたん。

ディーンや、ぬちびろいせ〜ん。

うやふぁ〜ふじが、みまむてぃとぅらちゃるば〜るやはじ。

いっぺ〜、に〜ふぇ〜で〜びたん。



  

ちゅうや、シカゴからワイオーミング州ぬ、ジャクソンホールんどぅるとぅくまんかい、いんじから、又シカゴんかい、むどぅてぃ、あんしから、ペンシルバニア州ぬ、ハリスバーグんどぅる、とぅくまんかい、いっちゃん。

12時間労働。。。

は〜、くぬワインぬ、ま〜はるくとぅ！！！




わぃ〜ぬ、写真や、ジャクソンホール空港からぬ、眺め







  

　
鈴蘭んでぃ、うみとぅ〜たるうぬ花や、じちぇ〜、「サマースノーフレーク」んどぅる、のーじね〜すん。

鈴蘭ぬ葉っぱやチューリップふ〜じ〜やしが、うれ〜、ぐな〜水仙ぬ、葉っぱとぅ似ちゅ〜ん。


ぬ〜やてぃんしむしが、いっぺ〜、可愛いぐぁ〜。



  

み〜らんしが！

やしが、わんね〜、うりが、気にいっちゅ〜ん。笑

  

なま、や〜ん中うてぃ、咲ちゅ〜る蘭。

め〜とぅし、くぬ時期に、咲ちとぅらすん。

ふかうて〜、ラッパ水仙が、咲ちっちゅ〜しが、くとぅしや、ま〜だ、ぜんぼ〜咲ちゅ〜かん。

球根、うぃ〜たしが、おそはたくとるやはじ。




フォーク作戦や、成功す〜るふ〜じ〜。笑



  

２ぐゎちぬ、はじめに、うちな〜んかい、６日間、け〜とぅ〜たくとぅ、時差ぼけし、にんだらん。

あちゃ〜、４じ起きやしが、ちゃ〜すがて〜。

あちゃから、わじゃやくとぅ、シカゴんかい、いっちゃるば〜るやしが、昼間、け〜にんたくとぅ、だ〜。。。

と〜と〜と〜。

だぁ〜、あんしぇ〜、羊ぬ数ゆでぃんちゅがや〜？

おやすみなさいませ。  

くとぅしん、な〜、最後ぬ、日〜んかい、なたん。

年末なれ〜から〜、あんだ〜ぎ〜、かみ〜ぶくないくとぅ、うってぃ〜、や〜んくしり〜うてぃ、揚ぎたん。

いっぺ〜ひ〜さたくとぅ、ちぬん、て〜まい、ちち、帽子ん、た〜ち、かんてぃ、焚き火んし〜がち〜な〜。




とぅないぬ、ゴクウん、あしび〜が、いっちゅうたん。




揚ぎ〜うわてぃから、ディーンとぅまじゅい、焚き火んめ〜うてぃ、乾杯。




ちゅうぬ、とぅしんゆるや、や〜んかいや、うらんくとぅ、年越しそばぬ、ちむいし、そーきそばんつくたん。





さ〜た〜あんだ〜ぎ〜ん、かみ〜ぶはっさ〜。。。

は〜な〜、かむるくとぅびっけ〜。。。笑

くとぅしん、て〜まい、笑てぃ、泣ち、感動し、出逢いんあてぃ、いっぺ〜いいとぅしやたん。

２０２４年や、わんぬ、生まり年ぬ、辰年。

ちゃんぐとぅ、とぅしんかい、ないがら？

いいとぅしんかい、ないるぐとぅ、努力はんね〜ならんさ〜。

と〜あんしぇ〜、ぐす〜よ〜ん、いいとぅし、いんけ〜てぃ、とぅらしみそ〜り。







  

くとぅしぬ、クリスマスや、ツリー無し。

ディーンん、わんにん、くとぅしや、ふゆ〜し、ツリー、いんじゃする気ぶんんかいならんたん。

ただぬ、言い訳るやしが、ちゃ〜んならん。

  

くぬめ〜、うぃ〜たる、ラッパスイセンとぅ、アジアティックリリーぬ、レイズドベッドんかい、フォーク、ナイフ、スプーン刺ち、にんにくん、ばら撒ちゃくとぅ、ゴクウとぅ、トービーや、中んかいや、いらんね〜すしが、真ん中んに〜が、荒らはっとぅ〜ん。

スプーンぬとぅくま、やたがら分からん。

あんすくとぅ、フォーク、て〜まい、こ〜てぃっち、な〜ひん、刺ちゃん。

あとぅ、にんにくん、な〜ひん、撒ち、くんど〜、玉ねぎん、いってぃんちゃん。

ちゃ〜ないがら？　












  

くん中んかいや、アジアティックリリーとぅ、ラッパ水仙うぃ〜たん。

球根うぃ〜たるあとぅ、プラスチックぬフォーク、ナイフ、スプーン、立てぃたん。





くれ〜、いんぐゎ〜とぅか、リス、うさぎが、中んかい、いっち、球根ふまらんぐとぅ、防止策ぬちむい。

あとぅ、にんにくとぅ、コーヒーぬカス、卵ぬ殻ん、ばら撒ちゃん。笑

きぬ〜、とぅないぬ、ゴクウが、いっちゃしが、中んかいや、いらんたん。

おりこう！

しちゃ〜、２０２１年に、はじみてぃ、球根うぃ〜たるとぅし。 src="https://cdn.jsdelivr.net/gh/twitter/twemoji@14.0.2/assets/72x72/2b07.png" style="width: 22px; height: 22px; vertical-align: sub;">

















ちゃ〜し〜ね〜、うった〜んかい、ふまらんぐとぅないがや〜？

んでぃち、しらびとぅ〜たれ〜、ユーチューブんかい、「フォークぬ、ちけ〜ぃみち」んでぃ、紹介はっとぅ〜たん。

にふぇ〜で〜びる！




  

くとぅしん、て〜まい、球根、こ〜たくとぅ、レイズドベッド、つくてぃとぅらちぇ〜ん。

サイズや、４’ x １６’ （１、２２m X ４、８８m）。

に〜ふぇ〜で〜びる！　



  

くりん、くとぅし、最後ぬ、花んかいないるはじ。

ちゅうぬ、ひてぃみてぃや、ー３℃やたくとぅや〜。

写真や、きぬ〜んむん。

とぅないんかいや、うり。



うん種類や、なちから、ちゃ〜咲ち〜す〜しが、道んけ〜さい、しちゃ、むち、ゆ〜いんだんね〜分からんくとぅ、ひもぐゎ〜し、ちゅぶるあぎて〜し〜し〜。

どぅくん、ちかんせ〜、ちっちかびぬんかい、いっとぅ〜ん。













  

クレマチスや、４ぐゎちに、て〜まい、咲ち、一回咲ちうわれ〜から〜、ちょびちょび、てぃ〜ち、た〜ち、１１ぐゎちわ〜き、ちゃ〜咲ち〜すん。

くとぅしや、うりが、最後がら分からん。

ちゅうや、最低気温が、０℃んかいないるふ〜じやくとぅ、な〜んかい、咲ちゅ〜る、一年草ぬ、花や、しんで〜しんで〜、うとぅるいてぃっちゅ〜ん。

かなさしが、しかたんね〜らん。

クレマチスや、多年草やくとぅ、来年、又、むどぅてぃちゅ〜くとぅ、うりたぬしみに、剪定はんね〜ならんさ〜。


  

わった〜や〜ぬ、マンダヴィラや、１０ぐゎちから、１１ぐゎちぬ、上旬が、一番上等。

あんすくとぅ、なまんうちに、て〜まい、写真とぅっとぅ〜かんね〜んでぃち、め〜にち、ちゃあとぅい。笑

うってぃ〜や、うまんかい、パンジーん、いってぃんちゃん。





  

くず、うぃ〜たる、パンジーが、むどぅてぃっち、可愛いぐゎ〜やくとぅ, くとぅしん、て〜まい、わぃ〜たん。

１２ぐゎちから、雪ん、降いるはじやしが、くずんむんね〜し、春にむどぅてぃち〜ね〜や〜んでぃ、うみ〜ん。







  

いちゃっさ草ひちん、ちゃ〜、又、いんじてぃちゅ〜くとぅ、くまんかいん、段ボール敷ちゅるくとぅんかいさん。

ちゃ〜ないがら？

効果や、来年、分かいるはじ。

薔薇が死なんけ〜しむしが。。。

うりが、いっぺ〜しわやたしが、たみしに、しんちゃん。

段ボールぬ、うぃ〜んかい、、いんちゃ、かきてぃ、あとぅから、モルチ、かき〜るちむいやん。











  

４泊５日し、オーランドんかい、いんじゅ〜るゑ〜だ、あみん、ふて〜かんたくとぅ、花ぬくとぅが、しわやたしが、くんとぅ〜い、いっぺ〜、がんじゅ〜。

５日間、みじ、くぃて〜かんてぃん、うんし、上等ぐxわ〜に、咲ちゅ〜ん。

ちゅ〜ば〜やっさ〜。

あんい〜ね〜、や〜、いんじ〜るめ〜に、くみぬ、研ぎ汁、かきたくとぅ、うりが、ちちるうがや〜？

反面、アジサイや、うんとぅ〜い。







みじぬ力、ちびら〜はっさ〜！






  

9/19/2023 ↑

3/31/2014 ↓

はんまよ〜！

桜ん幹が、一年し、１、５インチ、まが〜なとぅ〜ん。

くずや、１４、５インチんね〜んたる幹が、くとぅしや、１６インチやん。

わぃ〜たせ〜、２０１４年やくとぅ、うんとぅきが、１、５インチんでぃし、め〜とぅし、１、６インチな〜、ふどわぃ〜とぅ〜るくとぅんかいないん。

あんし〜ね〜、来年や、１７、６インチ、５年あとぅや、２４インチ、１０年さちや３２インチ。

どぅるくと〜、１００年さちや、１７６インチ（４、４７メートル）？

あんし、２００年さちや、３３６インチ（８、５３メートル）？

は〜や〜？

あね〜あらんはいや〜？

桜ぬ木〜ぬ寿命や、いくちわ〜きがや〜？

いちぐるわ〜き、ふどぅわぃ〜るば〜がや〜？

んどぅる疑問が、生まりてぃ、ググてぃんちゃん。

くたえや、

寿命や６０年〜７０年、樹齢が５０年すぎ〜ね〜、とぅしゆいぬ域んかい、いい〜んでぃがら。

あっは〜。。。。。

どぅるくとぅや、あとぅ、４１年びっけ〜や、花んだてぃ〜咲かち、がんじゅ〜んどぅるくとぅ。

なまから４１年後んでぃ〜ね〜、わんね〜、１００歳ど〜や〜。

ぃえ〜い！

うんとぅ〜し、かんげ〜ぃね〜、いちちゅる、ゆるくびん、ふぃ〜っさ〜。

わんにん、がんじゅ〜に、２０６４年（１００歳）わ〜き、いちち〜ぶはっさ〜。

  

２週間ぶりに、や〜んかい、け〜てぃっちゃん。

マンダヴィラや、とぅないぬ、マンダヴィラとぅ、てぃ〜ちなじっち、花がいっぺ〜可愛いぐゎ〜。

は〜っしぇ、どぅ〜んや〜が、一番、うちちちゅん。

や〜んかい、ちっちゃせ〜、ゆるなとぅ〜たくとぅ、あたびちゃ〜ぬ、合唱が、ゆんがしまはたしが、や〜んかい、け〜たんどぅる実感がわちゅん。

あたびちゃ〜や、あみふいぬめ〜なれ〜から〜、くゎ〜、くゎ〜、くゎ〜し、昼間ぬ、じ〜じ〜ね〜し、ゆんがしまはん。

あんしが、わんね〜、うぬ、あたびちゃ〜ぬ合唱がましやん。

うぬブログんかい、動画、ぬしららんしが残念やん。











  

ゆっかに、や〜、いんじてぃから、ま〜だけ〜て〜うかんくとぅ、ディーンが、ちゃ〜、な〜ぬ、写真、うくてぃ、とぅらすん。

なま〜、クレマチスとぅ、菊、ハイビスカスがさ咲ちゅ〜んでぃがら。

クレマチスや、春にさち、うれ〜、くとぅし、２回み〜ぬ花。

ハイビスカスや、なちから、ちゃ〜さち〜。

てぃ〜ち咲ちぇ〜、しぐうわてぃ、あんし、ふかぬ、花が、あまくまから、咲ちゅん。

な〜ぬ、真ん中んかいや、薔薇ぬ花、うぃ〜んでぃち、ディーンぬ作業ぬ、ゆうす、うくてぃっちゃん。