ウチナーグチし、ゆんたくさびら！

ちゅうや、ディーンぬ、ボスんかい、「ナシュビルうてぃ、竜巻が、あたんでぃ〜しが、やった〜や、ぬ〜んあらみ？」んでぃ〜る、テックスメッセージし、うくはったん。

テレビ、ちきてぃんちゃれ〜、ナシュビルんかい、いっちゃる竜巻が、まが〜ニュースんかいなとぅ〜ん。

わったぁ〜や〜から、２５マイル（４０キロびっけ〜）びっけ〜、うぃ〜んはらんかい、いんじゃるダウンタウンぬ、ジャーマンタウぬんかい、まゆなかぬ、１時ぐる、いっちゃるふ〜じ。

や〜ぬうぃ〜や、吹きとぅばはってぃ、建てぃむんや、ばらばら〜なてぃ、あとぅかたん、ね〜んなとぅ〜るとぅくまんあん。

と〜りとぅ〜る木〜とぅ、電線がからまてぃ、危険地区んかいなとぅ〜るとぅくまや、あまくま、立ち入り禁止んかい、なとぅ〜ん。

高速道路うて〜、セマイトラックが、２台、うっちんけ〜てぃ、３２マイル（５１キロびっけ〜）んかいわたてぃ、道路閉鎖んかいなてぃ、ひてぃみてぃぬ、ラッシュアワーんかい、まが〜影響、与ゐたん。

きぬ〜ぬ、ひてぃみてぃから、ゆるぬ、嵐んかいちっち、コードレッドぬ警報が、いんじとぅ〜たくとぅ、くくるぬ準備や、なとぅ〜るちむいやたしが、まさか、うんしまが〜竜巻ぬ、被害、受き〜んで〜うま〜んたん。

きぬ〜ぬゆるや、わった〜ん、雷ぬうとぅし、み〜さみたしが、竜巻ぬくとぅや、ちゅぶるんかいやね〜んたい、サイレぬん、鳴とぅ〜かんたくとぅ、うぬまま〜又、け〜にんたん。

むし、うぬ竜巻が、うまんかい、いっちゅ〜ね〜。。。んでぃ、うみ〜ね〜、うとぅるはぬならん。

最初に、確認はったる、け〜ま〜はったるちゅんちゃ〜ぬ、人数や、たいるやたしが、時間が経ち〜しんで〜、９名んかいなてぃ、あんし、あってんぐゎ〜に、１９名んかいなたんでぃうみたれ〜、なま（１３：００）又３名、ふぃ〜てぃ、２２名んかいなたん。

け〜ま〜ちゃる、うかたんちゃ〜ぬ、ご冥福をぅ、う〜と〜とぅ〜さび〜ん。　m(_ _)m





追記：　Enhanced Fujita Scale（改良藤田スケール）んでぃ〜せ〜、日本人気象学者、藤田哲也博士（１９２０－１９９８年）が、米国シカゴ大学うてぃ、竜巻とぅか、下降気流（ダウンバースト）現象を研究、竜巻の規模の基準とぅし、1971年に「F（藤田）スケール」をぅ考案し、米国に定着しみてぃ、国際的な指標んかいなたし。２００７年から技術的に精度んたかまてぃ、Enhanced Fujita Scale（改良藤田スケーる）んでぃ、ゆばっとぅ〜ん。


EF　０　　　　６５　ー　　８５MPH（毎時　　４０キロ　ー　　５３キロ）
EF　１　　　　８６　ー　１１０MPH（毎時　　５４キロ　ー　　６９キロ）
EF　２　　　１１１　ー　１３５MPH（毎時　　６９キロ　ー　　８４キロ）
EF　３　　　１３５　ー　１６５MPH（毎時　　８４キロ　ー　１０３キロ）
EF　４　　　１６６　ー　２００MPH（毎時　１０４キロ　ー　１２５キロ）
EF　５　　　２００　以上　　　　　 （毎時　１２５以上）