ウチナーグチし、ゆんたくさびら！

ちゅうから、セントラルアメリカぬ、パナマシティーんかいやいびーん。　ディーンぬ会社ぬ旅行やいびーん。
パナマシティーんでーからー、赤道から9°びっけー、うぃーんかい、いんじゅーるとぅくまやいびーくとぅ、いっぺー、あちはるはじ。
うまー、うってぃーわーき、氷点下やたるむんぬ、ちゅうーからー、あまんかいいんじ、短パンとぅ、ぞーりはち、ビーチとぅプールんかいいっち、ちゅはーる、焼ちちゅーるちむいやいびーん。　あんしが、皮膚がんぬくとぅん、あいびーくとぅ、ふどぅふどぅにはんねーないびらんさーやーたい。

あまんかい、ちけーからー、どぅーなー、なーめーめーし、行動しいちゅしが、最後ぬひーぬゆさんでぃや、会社主催ぬディナーがあいびーんでぃがら。
うぃきがんちゃーや、襟付きぬシャツとぅ、背広が必須、うぃなぐんちゃーや、カクテルドレスかサマードレスちらんねーないびらんくとぅ、うむっさいぎはぬないびらん。　カクテルドレスや、いちゃっさん、むちょーいびーしが、ちーる、きかいんねーらん、たんすぬ、こやしふーじーないびとーくとぅ、くんくぁいや、たーちむっちいちゃびーん。　いっぺー楽しみやいびーん。

ナシュビルからぬ便や、６時やいびーくとぅ、わったーや、やーからうすはてぃん、４：３０ねーいんじらんねーないびらん。　どぅるくとぅや、わんねー、化粧とぅか、かーらじぬばちぇーしーしーはんねーならんくとぅ、２：３０ねーうくらんねーないびらん。あんし、なまぬ時間や１：１０amやいびーくとぅ、なー、にんだんぐとぅー、ちゃーうきーすーちゅるちむいやいびーん。　ぬーが、きぬーん、にんだらんたくとぅ、４：３０わーき、ちゃーうきーやいびーたせー。　いちむぬくとぅるやいびーる。　　あんしが、いひぐぁーや、にーぶいしっちょーんでー。。。。。。。。。なま、にんでーからぁー、ぜったい２：３０ねーうきーはんくとぅ、ガームぐぁ、かみわるやる。

きぬーや、オレオをぅ、獣医ぬケネルんかいあじきてぃちゃびたん。　オレオや、あまうてぃ、どぅーが、あじきらりーんでぃち、わかいたるはじ。　。。。。。
わんにんかい、ひさ、たーちあぎてぃ、だきちちゅる体勢とぅってぃ、うとぅるはーすーるふーじーやいびーたん。　可愛そーぐぁーやいびーたしが、うりが、はじみてーあいびらんし、わったーん、オレオそーてぃ、いからんくとぅ、しかたがねーいびらん。　なまぐる、オレオやどぅしぐぁー、つくとぅーがらわからんし、獣医ぬケネルやし、ちゃんとぅ、世話しとぅらするはじやいびーくとぅ、あんちゅんちゃー、しんじーるしかねーいびらん。

1:25am。。。。
あーーーーーーー、ニーブイしっちゃん！

きぬーぬ夕飯や、手抜きし、インスタントカレーやいびーたくとぅ、ご飯がてーまい、ぬくとーいびーん。　わざとぅ、てーまい、つくいびたん。　ぬーんでぃちがんでぃーねー、ちゅーぬ朝、おにぎりつくてぃむっちいちゅんでぃちやいびーん。　やさ！　まーだおにぎり、つくてーかんくとぅ、なまからつくらひーたい！

あんすらー、またあとぅから。。。

くぬ、コンピューターん、パナマんかい、むっちいちゃびーくとぅ、また、あまんかい、ちっちから、ゆんたくさびらやーたい！