ウチナーグチし、ゆんたくさびら！

ちゅうや、やしみやくとぅ、バスルームぬ掃除ぐぁーさびたん。
わんぬ、アパートんかいや、みっちゃい、すどぅーるばーやいびーしが、わんとぅ、なーちゅいや、同じバスルームをぅ、ちかとーいびーん。うぬ、なーちゅいんどぅせー、ゲイぬわぃきがんぐぁやいびーん。わんが、うらんばーに、掃除すーがら、ぬーがら、わかいびらんしが、ちゃあー、うまんかい、けーてぃくれーからー、便器やはごーやし、しんくぬ、わぃーんかいや、ぬんきーうちきらってぃ、でーじ、わじわじーすくとぅ、わんねー、便器あらてぃ、うりがむん、かたじきとぅーるばーるやいびーん。わーむのー、むる、シンクぬしちゃんかい、かたじきてぃ、ありんかい、ふとぅんどぅ、スペースやくぃとぅーるちむいるやいびーしが、はーっしぇ、ぬーが、うんし、むちかさがらわかいびらんしが、どぅーぬ、ちかたる、ひげ剃り用ぬクリームとぅか、シンクぬゆくぬ台ぬわぃーんかい、ちゃーうちきーるやいびーんでー。しんくぬ、かがんぬ、とーあきーねー、うまんかい、うちきらりーるむんぬやー、はーなー、にーりてぃならん。あんしやー、わんが、掃除しから、ぐみしてぃーがいんじとぅーるばーに、どぅーんじゃーからいんじてぃいっち、わんが、けーてぃくれーから、うりぬ、むんが、またん、ふかんかい、いんじゃちるあるむんぬやー、いっぺー、わじわじーしねーらん！

わんねー、シンクとぅか、バスタブとぅかんかい、ぬーん、うちきらんぬーやいびーくとぅ、うんとぅーがあいねー、いっぺー、いらいらーしねーぃびらん。

やしが、うまー、わんどぅーちゅいし、すどぅーるばーや、あいびらんくとぅ、いひぐぁーや、我慢はんねー、ならんばーどぅやいびーがやー？　

うりん、わんにんかい、かってぃに、うりがむん、さーらしーせー、ましぇーあらんがらわかいびらん。　やしが、あんすらー、どぅーんのー、だてぃー、かたじきれーんでぃる、あびーぶはんでー。　

はーっしぇ、造花ん、便器んゆくんかい、うちきてーたしが、うりんやー、うりぬ、しーばいが、いちゃっさ、はにとぅーがら、わからんしが！　うぬ、造花ん、してぃーぶはしが、うれー、わんが、うまんかい、ちゅーるとぅきからあたくとぅ、かってぃに、してぃーるわきねーいかん。

ちゅうや、たいんなむん、話し合いぐぁーはんねーならんさー。。。


わんねー、どぅーんくとー、うんし、むちかはるうっちゅんでーうまーんしが、ちゃんぐとぅーがやー。神経質んでぃん、うまーんしが、わんぬ、ハウスメイトんかい、とぅってー、いっぺー、むちかはるうっちゅんでぃ、うみとぅーがら、わかいびらんさー。
共同生活んどぅせー、わんにんかいや、あーらんさー。。